By Pól Breathnach

Gearrchaille ’s stócach i dtús na ndéaga
faoi éadach rocach ar shop in éindí.

Caithriú na beirte: cíocha a’ péacadh,
fionnadh ag eascairt in ascaillí ’s i mbléine.

Fiosracht is fionnachtain, diurnú ’s freagairt,
tráthnóntaí samhraidh ’s a muintir sa gcathair.

B’ionadh liom do ghliondar is do ghníomha prasa.
Ghlac tú liom go corpartha; níor labhair ar easpa.

Phléasc tú i mo bhaclainn, freanga ar do ghnúis,
crith ar do ghéaga. Fuair tú mo thús,

is beannaím fós go buíoch thú, le glioscarnach mo shúl,
le dánaíocht mo ghlóir, le scafántacht mo shiúil.